قصة الكمبيوتر (3)

[عمر عادل صياغة]

الله يجعل أوقاتكن كلها خير
اليوم بالجزء الثالث رح نحكي عن الجيل الثاني من الحواسيب يعني بالفترة بين (1955 - 1965) :
حكينا الجزء الماضي إنو التعامل مع الحاسوب كان يتم بواسطة بطاقات مثقبة كان ينكتب عليها برنامج وحيد بعدين
تنطبع النتيجة بس بهذي الفترة صارت الناس تشعر بأهمية الوقت و بحاجتها لزيادة سرعة وفعالية المعالجة اللي
عبتصير بمساعدة الحاسوب وصار في حاجة لتنجيز أكبر وصار المبرمج يمل من شغلة إنو مابيقدر يساوي غير شغلة
وحدة كل مرة يعني إذا بدو يكتب برنامج في عمليتين لازم يكتبو على بطاقتين ويستنى كل بطاقة لتخلص و
ممكن يكون الناتج لأحد العمليتين دخل بالعملية الثانية وشغلات من هالنوع .
فصار التوجه نحو شي من الاختصاص وتقسيم العمل ( على فكرة هذا مبدأ من أهم مبادئ تطور الشعوب ورقيها
يعني سويسرا مافي داعي لتزرع موز بس بتعمل ساعات وبس وبالسعر اللي بتجيبو بهالصناعة اللي متخصصة فيها
بتجيب الموز من الصومال والصومال بيخربو كل مصانع الساعات اللي عندن وبيزرعو محلها موز وببيعو وهيك بسويسرا بياكلو
أحسن أنواع الموز وهن ماصرفو وقت وجهد ومال على زراعة شبه مستحيلة عندن وبالصومال بيلبسو أحسن ساعات بالعالم
وهن مافي عندن ولا مصنع ساعات) آسف على الإطالة ومنرجع لموضوعنا .
حققوا مفهوم التخصص بإنو صار نظام الحاسب مكون من آلتين أول وحدة آلة تمتاز بفعالية القراءة من البطاقات المثقبة
والطباعة وضافولها شغلة إنو بتقدر تخزن نتيجة البرامج اللي على البطاقات المثقبة على أشرطة ممغنطة ( مثل شريط الكاسيت تقريبا )
وطبعا هذي الآلة هي نموذج مطور من IBM1401 مثلا اللي حكينا عنو الجزء الماضي .
والجزء الثاني من هالنظام كان جهاز يمتاز بقدرة فائقة على الحساب والقراءة والتسجيل على الأشرطة الممغنطة مثل IBM7094.
ولحد اسا ماحكينا الشي المهم .
أهم شي كان هو القاسم المشترك بين هالآلتين واللي هو الشرائط الممغنطة وشوفو شو كان يصير.
كان يجي المبرمج أو المبرمجون ( لأنو صارو بيقدرو يكتبو برامج فيها عدة عمليات وممكن يكتب كل عملية مبرمج مثلا)
ويحط البطاقة المثقبة بالجهاز الأول .
مايستنى الخرج أو الطباعة بعديها يضيف البطاقة الثانية هيك ليخلص بطاقاتو.
بكل مايضيف بطاقة بيقوم الجهاز بمعالجتها(يعني قرائتها أو ترجمتها ) وتخزينها على شريط ممغنط ونتيجة العملية اللي بعدها عنفس الشريط وهيك للآخر
اسا صار عشريط واحد نتيجة دفعة هالأعمال هذي ومن هيك تسمى هالجيل بأنظمة الدفعات منجي لهذا الشريط منحطو بالجهاز الثاني
بقوم هذا الجهاز اللي هو سوبر بالعمليات الحسابية بمعالجة هالشريط والعمليات اللي علي و اللي ممكن تكون مترابطة
أو منفردة ودفعة وحدة وبيخزنها على شريط ثاني .
منشيل الشريط من الجهاز الثاني ومنرجع نحطو بالأول اللي هو كمان سوبر بقراءة الأشرطة والطباعة منها ومن نطبع النتائج
طبعا العملية اللي بتم أعقد شوي من الطبخة اللي فوق لأنو في بطاقات بيسموها بطاقات تحكم
بيستخدموها لتسيير العمل بالجهاز الثاني وتحديد زمن معاجة وطريقة معالجة وشو نوع العمل ونهايتو وشغلات بتوجع الراس
بس هذي البطاقات منيح اللي ذكرناها لأنها كانت بداية ونواة للغات البرمجة الحالية ومفسراتها و أدواتها واللي
رح نحكي عنها بعدين انشالله
بس توضيح بسيط إنو أسماء الأجهزة والشغلات اللي عمنحكيها على سبيل المثال لا الحصر بس المبدأ كان هو ذاته
ويمكن عبحاول ابعد شوي عن البنية المادية التفصيلية للأجهزة لأنو كان يستخدم فيها تقنيات مختلفة
المهم تأدي الغرض البرمجي بسرعة وأداء مميز
وممكن يكون في شغلات ثاني أني مابعرفها ياريت تفيدوني فيها
مشكورين ..
نسيت خبركم إنو صورة اليوم للجهاز IBM7094
منكمل بعدين وانشالله تظلكن بخير
أخوكم

[Lama]

يعطيك العافيه اخى عمر ع المجهود القيم والرائع


تحياتى لك

[عمر عادل صياغة]

شكرا إلكي عالمتابعة وهذ واجبنا
صراحة لما بشوف المشاهدات للموضوع بقول انشالله يكون عجب اللي
شافو ومابكون متأكد
ولما بشوف ردودك بقول الحمدلله إنو اتأكدت إنو الموضوع عالأقل قدرت أوصل في لحدا
من إخوتنا بالمنتدى
عكل حال الهدف إنو نقدر نوصل معلومة أو نذكر الناس بمعلومة بيعرفوها
شكرا لكل اللي بيشاهدو الموضوع
واسمحيلي اشكرك بشكل خاص عالتشجيع والمتابعة الحلوي وانشالله نكون مثل مابدكن