طال غيابك والله طال

[سمير غالب فليحان]

طال غيابك والله طال

سافر منذ زمن طويل .. تركها تكابد غيابه .. رغم صمتها التام استطعت أن أقرأ في تنهداتها
حاجي تضربلي مواعيد
قلبي من الضرب موجوع
بتقلي منفرح عالعيد
بيطلع عيدك كلو دموع
*******************
كل مرة بتقلي جاي
بحضّر حالي وبستنا
بدنا تكمل هالحكاي
ويقوم الفرح عنّا
دق الميّ وهيي ميّ
بيرجع يفشل هالمشروع
*******************
يا عمي شو عبتعمل
غبت وعنّا مش داري
تمرمر قلبي وتبهدل
يلعن إخت المصاري
حزنك بروحي غلغل
يمكن صوتي مش مسموع
*******************
رجعلي عاكل الأحوال
لو تشحد حق الطريق
ضاع العمر بحفنة مال
من حلمك يا غالي فيق
طال غيابك والله طال
ما حدا مات من الجوع
******************
بتتذكر إبنك الكبير
صار قد المسؤولية
بدّو يسافر بدّو يطير
شو رأيك شور عليي
غربة وأوجاع وتعثير
ذبت وما ذابت الشموع
*****************
بنتك صارت صبية
عبيتقدملا عرسان
فكري إستنا شويي
بلكي بترجع يا بو فلان
ولآ بعدك عالنيّة
مطنشنا وناسي الموضوع
*****************
شوف إمّك هالحنوني
عبتتحزّر عالصورة
ضعفو عيونا يا عيوني
عغيابك شو مقهورة
صفرا مثل اللموني
كل شبر بجسما موجوع

[haidarjamileddin]

يسلم ايديك وهذه فعلا بتصب كل الي بسافر ويتلرك اهله وناسه

مشكور عالموضوع وتقبل مروري يااخي الكريم

[اقتصادي]

الله حيك ابو غالب والله ماقصرت وصح لسانك
وقصيدة من الواقع بتعيشا كثير عائلات من مجتعنا والله يصبر الجميع

[أبو ريان]

مشكور على هالكلمات وهي فعلن شعور من يترك اهله وبلاده
الله يصبرنا ويقدرنا بغربتنا