قصة الكمبيوتر (1)

[عمر عادل صياغة]

الله يعطيكن العافية
حبيت اكتب سلسلة مواضيع اكتب فيها اللي بعرفو عن تاريخ الكمبيوتر
واسألكن عاللي انتو بتعرفو
طبعا مارح نذكر شغلات تقنية بحتة كثير هون بس أي استفسار أني جاهز للرد فورا
أول قصة عنا اليوم من البدايات
أول شي ما في حدا بالتاريخ ممكن نقول إنو اخترع الكمبيوتر لأنو إجا نتيجة بحوث طورت بعضها البعض لوصل للشكل اللي عنا اليوم والله أعلم شو بيطلع بعدين
خلينا نبلش
فترة ماقبل الحرب العالمية الثانية :
طبعا كلنا منعرف إنو هالفترة يعني شي قرن لورا كانت الناس بأوروبا و أميركا عبتتسابق بالبحوث العلمية تبعها وكانت بداية فكرة الحاسوب أجهزة تقدر تعمل حسابات بسيطة مابتتعدى العمليات الأربع بس كان الجديد فيها إنو الإنسان مريح بالو بس بيعطي الجهاز الأعداد و العملية وبيستنى الناتج
وبعدين لما صارت الناس تتنافس بين بعضها صار في حاجة للشغل أكثر بهيك أبحاث
وفينا نقول أول مبادرة بعرفها أني كانت على إيد مهندس بمصنع للقوات الجوية الألمانية واسمو
(كونراد زوس ) هذا المهندس عام 1936طور جهاز ميكانيكي قادر يحسب شوي شغلات معقدة يعني مثل الأعداد بالفاصلة العائمة مثلا مثل الرقم
(987.998765) وسمى الجهاز هذا Z1 وصورة هالقصة هي للجهاز اللي ساوا وهي بالملحقات.
ورجع طوروا وأنتجو منو Z2,Z3
طبعا هذا الجهاز بعدو بعيد 90% عن أجهزة الكمبيوتر الحالية بس كان فكرة من الأفكار
لهون خلصنا اليوم
إذا غلطنا بشي ياريت تصلحولنا و إذا حدا بيعرف شي زيادة بهالفترة ياريت يخبرنا
وأي سؤال أني مستعد جاوب علي
استنونا بالقصة الجاي انشالله
أخوكم

[Lama]

شكرا لك استاذ عمر ع المعلومات القيمه

موضوع رائع وعجبنى مره

وطريقة طرحك كانت بدون تكلف مرنه ومختصره ورائعه


متابعين لك ..


تحياتى لك

[عمر عادل صياغة]

شكرا على المرور الحلو
وانشالله نكون عند حسن ظنكم