قصة الكمبيوتر (4)

[عمر عادل صياغة]

الله يجعل أوقاتكم كلها خير صبح ومسا
اليوم بالجزء الرابع رح نحكي عن الفترة مابين (1965-1980) :
بهذه الفترة صارت الناس اللي شوي عادية ( يعني مش باحثين ) تقدر تتعامل مع الحواسيب وتستفيد
منا لأنو كلفتها انخفضت شوي وبطلت حكر عالمختبرات العلمية اللي أغلبها حكومية يعني صارت البنوك مثلا
تستخدم الحواسيب من نوع IBM1401وIBM7094 وبلشت التجارة تشتغل وصارت صناعة الحواسيب وتطويرها
شغلة واعدة بتحقيق أرباح خيالية فمثلا قامت شركة IBM واللي مثل ماشفتو كانت عملاقة وبالعة السوق بهالمجال
بإصدار نظام IBM360 واللي هو سلسلة حواسيب متوافقة مع بعضها من ناحية البرامج اللي ممكن تشغلها
بس بتفرق عن بعضها بالأداء وبالفاعلية ( يعني السرعة مثلا ) و أكيد بالسعر
وبعديها سلسلة من الحواسيب المتوافقة مع IBM360 مثل IBM3080 و IBM3090 و....
لهون خلصنا من هالفترة اللي كان التسابق فيها على الصناعة المادية ( الهارد وير ) اللي اتفقنا إنو رح نبعد شوي
عن التفاصيل التقنية إلها ونكتفي بذكر أسماء.
في مصطلح مرق مرتين بهالجزء ويمكن بيستحق نشرح عنو شوي بما إنو خلصنا الفترة
هذا المصطلح هو متوافقة .
التوافقية بالحاسوب شغلي مهمة كثير ومن أصعب الشغلات و المشاكل اللي بتواجه مطوري الأنظمة ( المبرمجين )
واللي بيشغلو بمجال الهاردوير.
خلينا نشبه التوافقية بمجموعة من الناس فيهن الكبير و الصغير و العالم والدكتور والفلاح وغيرو هذي المجموعة
إذا كانت من بلد واحد يعني بيحكو لغة وحدة فما في مشكلة أبدا بالتخاطب بيناتن حتى مع اختلاف الأفكار و الآراء
أما إذا كانو كلهن دكاترة أو كلهن فلاحين أو أي شي وطريقة تفكيرن واحدة بس كل واحد منهن بيحكي لغة شكل ومافي
شي يترجم بيناتن فما بيقدر أي واحد منهن يتفاهم مع الثاني .
الحقيقة هذا المثال بينطبق على التوافقية بمجال السوفت وير( البرامج ) و المنصات اللي بتتركب عليها( أجهزة الكمبيوتر)
قلنا فوق إنو الأجهزة اللي طرحتها IBM كانت متوافقة مع بعضها من حيث البرامج يعني البرنامج اللي بينزل على أحسن
واحد مثل اللي بينزل على أسوأ واحد (طبعا إذا كان بيحقق المواصفات الدنيا لتشغيل البرنامج ) و السبب بهذي
الشغلة متعلق بـ CPU (وحدة المعالجة المركزية أو المعالج بشكل عام ) اللي بكون إلها تعليمات خاصة فيها
بلغة اسمها لغة التجميع ( انشالله رح يكون في مواضيع تعريف بلغات البرمجة ) هذي اللغة هي نفسها اللي بيحكيها
الدكتور و الفلاح والكبير و الصغير اللي جايين من IBM مثلا وبالتالي اللغة وحدة و رح يتفقو أما إذا كانت وحدة المعالجة
من بلد ثاني (آبل أو ماكنتوش أو...) وما كان في مترجم فهون المصيبة ومارح يتوافقو وبتطلع رسالة إنو
هذا البرنامج مش مدعوم أو مش متوافق مع المعالج الموجود عندك بالجهاز فيا غير المعالج يابيفشل التنزيل وهذي نادرا
ما تصير بوقتنا بس ممكن نصادفها بأي وقت.
أما التوافقية بالنسبة للهاردوير فبدها كمان شرح بس بدنا نأجلو لبعدين بعد إذنكن احسن مانطول السيرة
صورة اليوم للكمبيوتر IBM3090 انشالله تعجبكن خصوصي إذا عرفتو إنو كل هالشي هو كمبيوتر واحد يعني هذا الصندوق و إلو شاشة
إذا طولنا لا تواخذونا واللي عندو شي ياريت يفيدنا
ومنكمل بعدين انشالله.
مشكورين....
أخوكم.

[Lama]