يا السويدا الغربي خلت فكري يحتار******نادى قلبي لعيونك ينظم اشعار
نادى قلبي لعيونك ينظم ابيات******صار الفكر يراودني و كثرو الكلمات
انتي الحاضر و الماضي بعدو ما مات****و المستقبل خطواته كفاية مشوار
فيكي اهلي و خلاني و فيكي حبابي****فيكي العشرة و اللمة وفيكي صحابي
فيكي القعدات الحلوي و الربابي ***** تروي احداث الماضي فيها شو صار
طمني كيفن اهلي قلبي ملهوف********جمعتهم حلوي قبالي مستني شوف
عن اشواقي برسالي عجزت الحروف *****ناطر ليفضا بالي و ارجع عالدار
كيف الموسم خبريني كيف الفلاح******ان شاء الله بشرت خير كروم التفاح
و العنقود المتخبي علم و لاح*******ارضك يا السويدا طيبة بتعطي اثمار
ارضك طيبي و الموسم علينا عاد****** النا موعد كل عام بوقت الحصاد
خيرك بيطوف علينا لو الله راد******** انتي بتعطينا و نحنا بنرش بذار
النا موعد بربوعك شوق و حنين**** ما منسى القطر بطعمك يا كوز التين
سقاالله القعدات الحلوي بتل جوانين***** زينا سفوحه العالي باجمل أشجار
اشتاقوا شفاف النشامى بعد الحرمان**** اطيب طعمي ذقناها و كانت عنوان
لما الدلي بتتركا على الفنجان *********بتسقينا طعمة هيل بشفة مرار
و المسمع صار ينادي دخلك محتاج*** حن بلحظة يطرب عصوت المهباج
و لساني حن لطعمة خبزات الصاج****** من ايد الام الغالي بيطلع قمار
عبناديلك بحياة العالي شيحان******* بخير تظلي و بحماية عين الزمان
و بحياة ال خلد ذكرك يا خضر متان***** بحياة حجار البلخي و عبد مار
ظلك متل ما انتي منبت للخير******* ارضك ملك النشامى ماهي للغير
ان كنك قاصد عسفوحا بالله يا طير****** بوسلي تراب الجبل داير مندار