اسئله للمغتربين فقط..

[رهوم]

حطو كاسه هالمتي حدكن وسمعو غناي بتحبوها بعدين تعو جاوبو::
يلا نبدا

1-ايمت خطر ع بالك انك تسافر؟
2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))
3-شو هيي الفتره الاصعب الي مريت فيها؟بالغربه؟
4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف منوين المصدر جاي ولا بتكمل طريقك ولا بتتزكر شي وبيجعك قلبك؟؟
5-بس بدك تجي زياره ع بلدك شو بتحس وانت ع الطريق ؟؟
6-بكل صدق ........اياها احسن بلدك ولا البلد الي انت فيه هلق وليش ومن اي ناحيه؟؟؟؟؟؟؟؟؟؟؟؟؟؟
يلا يا غربيي شرفوj7j7

[حاتم العطواني]

رهوم شكراً على الموضوع الحلو وانا رح جاوبك

-ايمت خطر ع بالك انك تسافر؟
بس خلصت البكلوريا .... وانرفضت بمعهد حمص على3 علامات

2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))
أهلي وحبيبتي

3-شو هيي الفتره الاصعب الي مريت فيها؟بالغربه؟
اول أسبوع كنت فيه هون

4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف منوين المصدر جاي ولا بتكمل طريقك ولا بتتزكر شي وبيجعك قلبك؟؟

والله ولا مرة صارت معي هون بس بالبيت عندي على طول مشغل مجوز عرمان (العياش) وعبرزخ اني ورفيقي رامي ابو فراج من السويداء بوجهلو تحية
5-بس بدك تجي زياره ع بلدك شو بتحس وانت ع الطريق ؟؟
بفكر على مين بدي سلم أول شي (بيي أو أمي) ههههه عبمزح
أكيد شعور اي مغترب عبيشم ريحة بلدو من بعد غياب طويل شعور لا يوصف

6-بكل صدق ........اياها احسن بلدك ولا البلد الي انت فيه هلق وليش ومن اي ناحيه؟؟؟؟؟؟؟؟؟؟؟؟؟؟
هيك وهيك
يعني بلدي ما بتعملي مستقبل .... بلد الغربي بتعمل
ببلدي اهلي ورفقاتي وأهلي ...... بلد الغربي مقطوعة

هذه بعض الفروق




مشكورة على الموضوع الحلو وتقبلي مشاركتي

[رهوم]

شكرا حاتم ع الرد الي كنت حاتم فيه
ويلا عم ننطر الشباب الباقين

[ALHAKIM]

أزواج للبيع

في إحدى المدن تم افتتاح متجر لبيع (الأزواج) حيث يمكن للمرأة الذهاب لاختيار زوج بنفسها ومن بين التعليمات التي وضعت في المدخل حول أسلوب عمل المتجر: أن للمرأة فرصة الدخول مرة واحدة للمتجر ! ويمكن الاختيار من أحد الطوابق أو الذهاب إلى الطابق الآخر الأعلى منه ولكن لا يمكن النزول إلى أسفل.

:

:

دخلت إحدى النساء (لمتجر الأزواج) لاختيار زوج لها

في مدخل الطابق الأول علامة :

الرجال هنا لديهم عمل ومؤمنون بالله

وفي مدخل الطابق الثاني علامة :

الرجال هنا لديهم عمل ومؤمنون بالله ويحبون أطفالهم

وفي مدخل الطابق الثالث علامة :

الرجال هنا لديهم عمل ومؤمنون بالله

ويحبون أطفالهم وشكلهم جذاب

وكانت المرأة تـفكـر 'واو ولكن سأستمر بالصعود'

وقد وصلت إلى الطابق الرابع لتجد علامة :

الرجال هنا لديهم عمل ومؤمنون بالله ويحبون أطفالهم وشكلهم جذاب ويساعدون زوجاتهم في أعمال المنزل

فتعجبت في خلجات نفسها

' يا إلهي إني لا أستطيع التحمل سأوافق '

ولكنها استمرت بالصعود

وفي مدخل الطابق الخامس وجدت علامة :

الرجال هنا لديهم عمل ومؤمنون بالله ويحبون أطفالهم وشكلهم جذاب ولهم قابلية رومانسية عالية لمغازلة زوجاتهم دائماً

وكادت أن تطأ قدمها ذلك الطابق إلا أنها استمرت بالصعود

وفي مدخل الطابق السادس وجدت علامة :

أنـت الـزائـرة رقـم 4.363.012

ليس هناك أي رجال في هذا الطابق


لأن هذا الطابق وجد خصيصا كبرهان أن النساء لا يمكن إرضاؤهم شكراً للتسوق في 'متجر الأزواج' وانتبهي لخطواتك وأنتِ تخرجين ونتمنى لكِ يوما سعيداً

ــــــــــــــــــــــــــــــــــــــ

أرسلوها إلى كـل الرجال ذوي الضحكات القوية وإلى كـل النساء اللواتي يمكن أن يستوعبن الحقيقة

[رهوم]

??????????????????????

[minyar]

امت خطر ببالك تسافر
الموضوع بالاساس ما راح من بالي
السبب الرئيسي
يمكن كل يلي ذكرتيهن بس بالفترة الاخيرة اكيد الملل
شو هي الفترة الاصعب
من البداي حاسب انو ما جاي اعمل سيران لهيك ممكن ما مر علي فترة صعبة
شو بتحس لما تسمع غنية جبلية
ههه للاسف بمشي بالشارع ما بسمع غنية لا جبلية ولا غيرا الا من شي سيارة بتكون محششي
لما بدي ارجع على بلدي شو بحس
لهلق ما جربت بس اكيد بكون متشوق لوصل
اياها احسن
كل شي الو سلبيات وايجابيات يعني بلدي لوفيها العمل هلي يأمن المستقبل يلي بفكر فيه اي شاب ما كان حدا بيطلع منا ومع هيك بتظل هي الاحلا

[الاميرة هادية]

رهوم شكراللموضع الحلو الي منشوف ومنتابع فيه افكار الغياب اختك هاديةteto_65

[<فادي >]

[quote=رهوم;8179]حطو كاسه هالمتي حدكن وسمعو غناي بتحبوها بعدين تعو جاوبو::
يلا نبدا

1-ايمت خطر ع بالك انك تسافر؟
من وقت ما سكرت بوجهي الدنيا
2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))
كلن والاخص الاخص...........
3-شو هيي الفتره الاصعب الي مريت فيها؟بالغربه؟
اول فتره دايما اصعب شي وبس تتعرض لشي بالوطن ووتأثر فيه وانت برا كمان شي صعب
4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف منوين المصدر جاي ولا بتكمل طريقك ولا بتتزكر شي وبيجعك قلبك؟؟
اووووووف مكل النهار حاطط هالاغاني بالبيت
5-بس بدك تجي زياره ع بلدك شو بتحس وانت ع الطريق ؟؟
ما بعرف بحتار اذا كان حنين ولا حب ولا ولا ولا ولا بس كلو بيهون بس تشوف الي بتحبن
6-بكل صدق ........اياها احسن بلدك ولا البلد الي انت فيه هلق وليش ومن اي ناحيه؟؟؟؟؟؟؟؟؟؟؟؟
هلق يا ريت يصير مزيج بين بلدي وهون لانو رح يطلع مكان كتير حلو ومتكامل
من جهه فيه الناس الي منحبن
ومن جهه في المستقبل
شكرا عا لموضوع

[رهوم]

[quote=رهوم;8179]حطو كاسه هالمتي حدكن وسمعو غناي بتحبوها بعدين تعو جاوبو::
يلا نبدا

1-ايمت خطر ع بالك انك تسافر؟
من وقت ما سكرت بوجهي الدنيا
2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))
كلن والاخص الاخص...........
3-شو هيي الفتره الاصعب الي مريت فيها؟بالغربه؟
اول فتره دايما اصعب شي وبس تتعرض لشي بالوطن ووتأثر فيه وانت برا كمان شي صعب
4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف منوين المصدر جاي ولا بتكمل طريقك ولا بتتزكر شي وبيجعك قلبك؟؟
اووووووف مكل النهار حاطط هالاغاني بالبيت
5-بس بدك تجي زياره ع بلدك شو بتحس وانت ع الطريق ؟؟
ما بعرف بحتار اذا كان حنين ولا حب ولا ولا ولا ولا بس كلو بيهون بس تشوف الي بتحبن
6-بكل صدق ........اياها احسن بلدك ولا البلد الي انت فيه هلق وليش ومن اي ناحيه؟؟؟؟؟؟؟؟؟؟؟؟
هلق يا ريت يصير مزيج بين بلدي وهون لانو رح يطلع مكان كتير حلو ومتكامل
من جهه فيه الناس الي منحبن
ومن جهه في المستقبل
شكرا عا لموضوع
شكرا عالرد يا فادي واهلا سهلا فيك عضو جديد

[EHAB ALHALABI]

انا مو مغترب الحمدالله

بس موضوع فعلا حلو رهوم ..

لذا ما اقدرت اطلع بدون رد

مشكورة

[hfrmo]

حطيتي إيدك عالجرح و الجرح كثير عميق
أني إلي 17 سنة متغرب و السبب للأسف بالبداية كان منشان الجيش مش لأنو الجيش بعبع لكن موضوع قناعات.
خلال مدة الغربة نزلت مرة بعد 11 سنة لقيت حالي غريب و ما قدرت اقعد أكثر من شهر و ظليت مشتاق و ندمان على طول المدة اللى قضيتها بعيد بس صدقا لما رحت و شفت و اسمعت تأكدت انو قراري بالاستقرار بالغربة كان أحسن.
واللي بعزي الواحد انو اليوم مش مثل زمان التلفون بيحل مشكلة والنت بتحل مشكلة و اللي بدك تروح تشوفن ببلدك فيك تجيبن لعندك و صدقوني إذا الواحد كان حاسس بالغربة ببلدو هون المشكلة.


اسمحولي إذا كنت ثقيل بس موضوع كثير حلو و مهم و حساس و الحال من بعضو

وسلامتكن

[انور الزغير]

1-ايمت خطر ع بالك انك تسافر؟
بس خلصت جيش وصار لازم امن مستقبلي

2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))

اكيد مثل اي شب بفكر بتحسين الوضع

3-شو هيي الفتره الاصعب الي مريت فيها؟بالغربه؟

ساعة الي بيجي موقف وبيحس الواحد انو لو معومال الدنيا بالغربة مافي حدا جنبو

4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف منوين المصدر جاي ولا بتكمل طريقك ولا بتتزكر شي وبيجعك قلبك؟؟

انا صار معي هالموقف ووقفت وتعرفت على الشباب وطلعوا من درعا

5-بس بدك تجي زياره ع بلدك شو بتحس وانت ع الطريق ؟؟

ما بصدق على الله لوصل

6-بكل صدق ........اياها احسن بلدك ولا البلد الي انت فيه هلق وليش ومن اي ناحيه؟؟؟؟؟؟؟؟؟؟؟؟؟؟

اكيد ما في احسن من بلدنا لوجود الاهل والاصدقاء
واكيد كمان البلد الي انا فيها (قطر ) الها فضل كبير عليي وبعتبرها بلدي الثاني
وبيقول المثل مطرح ما ترزق الزق

شكرا يا رهوم على موضوعك المميز والحساس

[القناص]

أمت خطر ببالك تسافر؟؟
لمل خلصت ثانوي أدبي ..وما حصلت جامعة ...فاخترت طريق السفر
السبب الرئيسي؟؟
بيشمل الخيارات الثلاثة .فهذه مسوؤلية كل شاب
شو الفترة الاصعب؟؟
من اللحظة الي طلعت من مطار دمشق ... الى اللالالالالالان
شو بتحس لمل بتسمع اغنية جبلية ؟؟
اللاغاني الجبلية ما بتفارقنا صدقاً....لانو سمعها بتدفعك معنوياً
لمل بدي ارجع ع بلدي شو بحس ؟؟؟؟؟؟
شعور لايوصف
اياها احسن ........
برغم من السيئات الموجودة ببلدنا فهي افضل ؟
شكرا(رهوم)ع الموضوع الجميل وتواصلك العذب .
لك فائق تقديري واحترامي

[ملك العين(UAE)]

1-ايمت خطر ع بالك انك تسافر؟\
بس خلصت بكالوريا
2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))
حبيبتي وتحسين وضعي الشخصي اما اهلي الحمد لله مقتدرين
3-شو هيي الفتره الاصعب الي مريت فيها؟بالغربه؟
كل ما احكي مع حبيبتي وتسأليي ايمت جاي بحسا انا اصعب فتره
4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف منوين المصدر جاي ولا بتكمل طريقك ولا بتتزكر شي وبيجعك قلبك؟؟
اكيد كنت وقف وشوف من وين جاي المصدر وكنت اتذكر اشيا و مش بس يجعني قلبي ويعصر عصر من الالم
5-بس بدك تجي زياره ع بلدك شو بتحس وانت ع الطريق ؟؟
بحس اني طاير من الفرحه بس لاني بدي شوف حبي الاول والخير واهلي
وعلى فكره هاي البنت خطيبتي مش حب هيك حكي
6-بكل صدق ........اياها احسن بلدك ولا البلد الي انت فيه هلق وليش ومن اي ناحيه؟؟؟؟؟؟؟؟؟؟؟؟؟؟
البلد اللي اني فيها هلق ليش لاني عايش كل عمري فيها وبعرفا اكثر من بلدي الاساسي (سوريا)
اما من اي ناحي من ناحية الماده متوفره اكثر من بلدي
لان الحمد لله السوق ماشي وكل شي تمام وهون اللي بدك ايا بتسوي وبتشوفوا وتشتري اما بلدي بحبا لان اهلي و خطيبتي فيها مش اكثر اكيد

وتقبلي مروري المتواضع اختي رهوم المضوع حلو

[aaa]

الله يعطيكي العافيةعلى الموضوع الرائع والحساس

[ابن لبنان]

1-ايمت خطر ع بالك انك تسافر؟

مش بأيدي اهلي جابوني لمن كنت زغير وضليت بالغربي وما شفت بلدي

2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))
تقريبآ كل هول ..بس بدون حبيبة هههه آل يعني

3-شو هيي الفتره الاصعب الي مريت فيها؟بالغربه؟
كل شي صعب بالغربي وخاصة يمر وقت عليك تقولي يلعن هالدنيي يلي جيت عليها


4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف

منوين المصدر جاي ولا بتكمل طريقك ولا بتتزكر شي وبيجعك قلبك؟؟
بصراحة ولا مرة صآرت معي وسمعت شي عن الجبل ولو سمعت بنبسط كتير
5-بس بدك تجي زياره ع بلدك شو بتحس وانت ع الطريق ؟؟
لسآ مازرتآ ولا مرة نشالله زورآ .. ادعولنا ههه

6-بكل صدق ........اياها احسن بلدك ولا البلد الي انت فيه هلق وليش ومن اي ناحيه؟؟؟؟؟؟؟؟؟؟؟؟؟؟
لا والله لبنــــــــــــــــــــــــــــــــــآن ما في منو بس شو بدنآ نسوي مقدر ومكتوب
وهيك مكتوب علينآ نكبر ونربى بالغربي ...

[omaia haval]

1-ايمت خطر ع بالك انك تسافر؟
عندما أحسست بغربتي وانا بين اهلي وعندما ضاقت الأماكن
وشاء الرحمن أن أسافر لا مهزومة ولكن عاشقة ذاهبة لحبيبها وزوجها
2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))
الحُب والزواج
3-شو هيي الفتره الاصعب الي مريت فيها؟بالغربه؟
ليست لدي فترات صعبة بالمعنى المقصود
4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف منوين المصدر جاي ولا بتكمل طريقك ولا بتتزكر شي وبيجعك قلبك؟؟
بدون أن أسمع اي شيء يبقى الشوق والحنين لكُل شارع وطريق بسوريا عامة والشام خاصة

5-بس بدك تجي زياره ع بلدك شو بتحس وانت ع الطريق ؟؟
ااالله يعيني عالمطار ويلي بيصيرلي بالمطار
6-بكل صدق ........اياها احسن بلدك ولا البلد الي انت فيه هلق وليش ومن اي ناحية؟
لو بلد الواحد كومة تراب بيكون بعيونوا احلى من اي بلد بالعالم
واي شي الواحد بيشوفوا برا بيقول لحالوا ليش نحن موهيك
بيكفي هيك

شكراً كتير عا هالأسئلة

[omaia haval]

الصراحة أجوبة كتير عجبتني بردود الأعضاء
وفعلاً أسباب اقل شي بينقال عنا انو غيرررر شكل

بس خلوني واسمحولي رد عاأبن لبنان
في اجوبة كتير الو بطير العقل ماشاءالله عليه وبدون حسد

بس اسمحلي ياابن لبنان الطيب اسئل
وين الغربة؟ بالبنان!!!!!!!!
انا بعرف بينا وبين الشام اكتر شي ولو طول الطريق ساعتين

كنو لبنان غيرت خارطتها وصارت بالقطب المتجمد الشمالي
يمكن حاكم كلو بيصير بهالزمن

يسعدو يامغترب

[ابو نجم]

1-ايمت خطر ع بالك انك تسافر؟
الحمدلله لما رسبت بالبكالوريا وسكرت الدنيا بوجهي
..
2-شو هو ي السبب الرئيسي((تحسين وضعك-اهلك-حبيبتك-ملل.........او كلن ))
اكيد لتحسين وصعي وبناء مستقبلي!!
..
3-شو هيي الفتره الاصعب الي مريت فيها؟بالغربه؟
اكيد اول ما وصلت البلد هون وبعد كل اجازة برجع فيها من البلد!!
..
4-شو بتحس بس تسمع اغنيه جبليه بالصدفه وانت ماشي ببلد الغربه ؟؟؟بتقرب لترعف منوين المصدر جاي ولا بتكمل طريقك ولا بتتزكر شي وبيجعك قلبك؟؟
صارت معي وتعرفت يومها على شب من شقا
..
5-بس بدك تجي زياره ع بلدك شو بتحس وانت ع الطريق ؟؟
اكيد شعور ولا بعدو اي شعور متل اللي داخل على الجنة
دخيل ريحة بلدنا
..
6-بكل صدق ........اياها احسن بلدك ولا البلد الي انت فيه هلق وليش ومن اي ناحيه؟؟؟؟؟؟؟؟؟؟؟؟؟؟
ما فينا نقول انو
بلدنا او بلد الغربة احسن لانو بالتأكيد فرق كبير
بلدنا خلقنا وربينا فيها وكل اهلنا والقرايب والجيران والاصحاب
والاحباب فيها
بس منرجع منقول الشخص بيتغرب لتحسين وضعو وبداية
مستقبلو فيها فترة ومرجوعنا عالبلد
مافي النا غنى عن البلد
بلدنا اجمل واحن بلد بالكون
..
مشكورة اخت رهوم
حطيتي ايدك عالجرح
تقبلي تحياتي

[جبر اسماعيل المقت]

الغربة
ونّات قلبي رافقت رمشـــــة العين ....... و نهدات صدري سابقت تكة السّاع
.
في غربة ٍ طالت بنا سنين و سنين ....... تطوي ليالي عمرنا بلا أية شــــفاع
.
و تمحي ســـــوالف حبنا و العناوين ....... و تدعي الثمين بعازة السّوق ينباع
.
لمين أشــــكي علـــة الـــرّوح لمين ...... و أنا الــــذي بـِ مـــــــرقد الأه مــلتاع
.
مفارق هلـي و الاصدقة و المحبين ...... و تايه بلــــج امواجها و فاقد شـــراع
.
أرقب إدراك الشّــــط من حين لحين ...... و أطوف نوبة و نوبة ٍ اعــــــوم للقاع
.
و أمــــضغ مرارة زومــها و المغابين ...... و أكضم هيام بأســــــره القلب نزاع
.
و تســـــري جمار ٍ بالدّما و الشّراين ...... أحســـــــها بلب الكـــبد تزرع اوجاع
.
أخــــمد لهبها و تسـعره زايدة الزّين ...... بنية تنادي بشـــوق يا حـــبنا ارجاع
.
جبر اسماعيل المقت
أبو ظبي
.
شو بنا نحكي عن السّفر لنحكي !!!!!!!!!! حكينا كثير و مل القلب
.
تحياتي لكم بإحترام
.

[بنت البلد]

حطيتي إيدك عالجرح و الجرح كثير عميق
أني إلي 17 سنة متغرب و السبب للأسف بالبداية كان منشان الجيش مش لأنو الجيش بعبع لكن موضوع قناعات.
خلال مدة الغربة نزلت مرة بعد 11 سنة لقيت حالي غريب و ما قدرت اقعد أكثر من شهر و ظليت مشتاق و ندمان على طول المدة اللى قضيتها بعيد بس صدقا لما رحت و شفت و اسمعت تأكدت انو قراري بالاستقرار بالغربة كان أحسن.
واللي بعزي الواحد انو اليوم مش مثل زمان التلفون بيحل مشكلة والنت بتحل مشكلة و اللي بدك تروح تشوفن ببلدك فيك تجيبن لعندك و صدقوني إذا الواحد كان حاسس بالغربة ببلدو هون المشكلة.


اسمحولي إذا كنت ثقيل بس موضوع كثير حلو و مهم و حساس و الحال من بعضو

وسلامتكن




راي من رايك كمان .....شكرا رهام موضوع حلو